សេចក្ដីប្រកាសព័ត៌មាន៖ ឯកឧត្ដមឧបនាយករដ្ឋមន្ត្រី ប្រាក់ សុខុន នឹងអញ្ជើញចូលរួមសន្និសីទថ្នាក់រដ្ឋមន្ត្រីហ្វ្រង់កូហ្វូនីលើកទី៤៦ នៅទីក្រុងគីហ្គាលី សាធារណរដ្ឋរវ៉ាន់ដា
នៅថ្ងៃទី១៥ ខែវិច្ឆិកា ឆ្នាំ២០២៥ ក្រសួងការបរទេស និងសហប្រតិបត្តិការអន្តរជាតិ បានចេញផ្សាយសេចក្ដីប្រកាសព័ត៌មានមួយ ដោយប្រកាសថា ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នឹងចូលរួមសសន្និសីទថ្នាក់រដ្ឋមន្ត្រីហ្វ្រង់កូហ្វូនីលើកទី៤៦ នៅទីក្រុងគីហ្គាលី សាធារណរដ្ឋរវ៉ាន់ដា ចាប់ពីថ្ងៃទី១៩ ដល់ថ្ងៃទី២០ ខែវិច្ឆិកា ឆ្នាំ២០២៥។ ខ្លឹមសារសំខាន់នៃសន្និសីទគឺ “ការរួមចំណែករបស់ស្ត្រីនៅក្នុងបណ្ដាប្រទេសហ្វ្រង់កូហ្វូនី”។ កម្ពុជានឹងចែករំលែកព័ត៌មានស្ដីពីការត្រៀមរៀបចំរបស់ខ្លួន ក្នុងនាមជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី លើកទី២០ នៅឆ្នាំ ២០២៦។ បន្ថែមពីនេះ ឯកឧត្ដមឧបនាយករដ្ឋមន្ត្រី ប្រាក់ សុខុន ក៏នឹងបំពេញ ទស្សនកិច្ចផ្លូវការ នៅសាធារណរដ្ឋរវ៉ាន់ដា នៅថ្ងៃទី១៨ ខែវិច្ឆិកា ឆ្នាំ២០២៥។ ក្នុងអំឡុងនៃទស្សនកិច្ចនេះ ភាគីទាំងពីររំពឹងថានឹងចុះហត្ថលេខាលើ អនុស្សរណៈនៃការយោគយល់គ្នា (MOU) ដើម្បីពង្រឹងកិច្ចសហប្រតិបត្តិការ។ ឯកឧត្ដម ក៏នឹងជួបប្រជុំទ្វេភាគីជាមួយ អគ្គលេខាធិការអង្គការអន្តរជាតិហ្វ្រង់កូហ្វូនី (OIF) និងសមភាគីបរទេសផ្សេងទៀតពីបណ្ដាប្រទេសជាសមាជិក (OIF) ផងដែរ។
ក្រសួងការបរទេស និងសហប្រតិបត្តិការអន្តរជាតិ
